政情：公民講場：周日撞正落區 避着黑白黃

特首梁振英（CY）繼出席天水圍公眾論壇後，將會喺嚟緊嘅星期日再落區，去觀塘同市民見面。雖然離CY落區尚有幾日，不過社民連、人民力量同熱血公民已經諗定着咩顏色嘅衫、用咩方式去抗議。社民連吳文遠就呼籲民眾當日着白衣對抗黑勢力，仲話泛民同大學生團體都可能會響應佢嘅建議。不過人民力量同熱血公民就講到明唔會聽社民連支笛，會各自呼籲支持者穿着佢哋嘅黃色制服踩場。睇嚟如果班觀塘街坊落街時唔想畀人當示威者，睇怕唔使睇通勝都知，是日不宜着黑色、白色同黃色衫喇。