政情：樹根講古 「鍾」愛從政
陳、李、張、黃、何係為人熟悉嘅姓氏，原來鍾氏都係個大姓，喺現今《百家姓》入面排一百名之內。立法會入面其中一位姓鍾嘅議員鍾樹根就同我哋分享鍾姓歷史，佢話好多姓鍾嘅人都鍾意從政，但大多數都會得罪老闆喎。
好多得罪皇帝被罷或斬頭
翻查網上資料，古代好多姓鍾嘅大官真係因頂撞皇帝而被罷官或斬頭。樹根咁講，似乎若有所指喎，莫非佢得罪過老闆？佢即時笑笑口話，佢老闆咪係老婆囉！
講番鍾姓歷史，樹根話鍾姓祖宗源於河南省許昌市，依家遍布世界各地，台灣、新加坡同香港都有好多鍾姓人士，有啲係客家人，有啲係廣東人。早前廈門舉行咗一個一連三日嘅鍾氏宗親會世界大會，當地嘅鍾姓人士，就係畬族人，可能係以前移民去到嗰度，一代一代咁融入畬族。但得意嘅地方係，佢哋嘅祠堂同世界大部分鍾氏祠堂一樣，都係叫「潁川堂」，唔知咁樣係咪意在易啲相認咁話。