中環出更：胡志強代言 太陽餅勁賣
台灣糕餅美食一向受港客歡迎，其中台中盛產嘅太陽餅亦係熱賣手信之一，要數最大功臣，非太陽餅代言人台中市市長胡志強莫屬。尋日胡志強又再率領一班台中糕餅業者來港推介，就算風球高掛都風雨不改。佢細數話，十年來太陽餅銷量勁升三十三倍，茶葉就增長五倍，成績都算唔錯。
來港宣傳 愛女偕婿冒雨撐場
被視為台灣政壇明星嘅胡志強魅力沒法擋，冒雨去捧場嘅人多到爆，佢嘅獨生女胡婷婷同老公Julio，即澳門混血雙胞胎歌手組合Soler中嘅哥哥，亦突然現身助陣，氹到胡志強笑呵呵。胡志強話，佢做台中市市長已十二年，多年來囡囡從未試過公開為佢撐場。不過前晚阿女同女婿由美國返港，臨時決定畀個驚喜佢，當然甜到漏啦。
卓妮趁機同胡婷婷傾兩句，佢話依家台港兩邊走，今次撞啱丈夫返港公幹，所以就嚟探爸爸。台灣政壇千金都好有個性，除咗馬英九總統長女馬唯中低調結婚之外，胡婷婷年初亦閃嫁Julio，胡志強喺兩人婚前十幾日至知情，認真「驚喜」。
卓妮