中環出更：風雨不改 名人開工
今年首個八號風球終於喺尋日凌晨高掛，雖然下晝兩點前已經落番三號波，但突如其來的半日假，唔少打工仔都好開心。不過唔係個個都咁鍾意打風，卓妮中午喺中環行咗個圈，已經見到唔少名人如常上班，有啲就整裝待發，食定午餐準備返回「戰場」，認真勤力。
尋日下午一點，仲係八號風球，卓妮見到匯寶集團主席郭永亮（Andy）同太太黃兆賢（Flora）帶埋囝囝齊現身金鐘太古廣場一間意大利餐廳，隨行仲有一名外傭。Andy話，囝囝因打風唔使返學，但太太就要喺落波之後返工，諗住一家慢慢歎完午餐，再送愛妻返工。
喺中環，卓妮又見渣打香港行政總裁洪丕正（Benjamin）同一名女職員雙雙經過太子大廈，二人行色匆匆咁走向銀行總行，邊行邊密斟。Benjamin話，其他同事唔使上班，不過佢就無假放，食完晏繼續就要返去開工。
冒住打風返工嘅仲有賭王四太梁安琪（Angela）長子何猷亨。到咗下午茶時間，卓妮喺中環置地廣場遇見佢哋兩母子及兩位男士步入Cafe Landmark。原來猷亨做緊暑期工，連八號風球都堅持照返工，仲做到過晒鐘至食晏。不過猷亨似乎好忙，半粒鐘內將美食掃光，同媽媽揮手道別後離開。
打風累唐唐買唔到凍啡
同一時間，前政務司司長唐英年亦現身太子大廈，佢一支箭咁走入相熟咖啡店，打算買杯凍咖啡提神。點知咖啡店因打風冇冰粒供應，唐唐買唔到凍啡寧願唔飲，兩手空空離開。
卓妮