嬲到震！嬲到震！真係嬲到震！點解咁多偷窺狂鍾意侵犯私隱o架！
美國政府侵犯全人類私隱就話有反恐嘅需要啫，內地竟然有好多個同反恐無關嘅網站，公然兜售個人資料，而且以一蚊雞嘅售價賤賣，受害者唔嬲到出煙就假啦！
即係咁，愈來愈多香港人使用內地網站購物，原來送貨單據上面嘅個人資料有價有市。記者喺內地搜尋網站輸入「單號」、「售賣運單」等等關鍵詞彙，出現百幾個網站列出不同物流公司以及不同來源地嘅收貨單據價錢，每一個人嘅資料售價介乎五角至兩元人民幣。
記者聯絡其中一位賣家，以一元人民幣一張嘅價錢，買咗十二張喺香港收貨嘅單據，收貨人資料包括姓名、電話、地址同身份證號碼等等。記者按資料聯絡到幾名香港收貨人，證實全部資料真確無誤。亦即係話，國產奸商盜取個人資料作為牟利用途，起你底嘅無良行為簡直賤格過鹹濕伯父偷人底褲！
私隱外洩嘅後果可大可小o架，萬一個人資料落入犯罪集團手中，打電話「猜猜我是誰」行騙已經夠煩啦，更加可怕嘅係直接指名道姓恐嚇勒索，到時真係唔知乜嘢世界。
好衰唔衰嘅係，香港私隱專員公署竟然話無能為力。署方發言人話喎，對於境外機構並無管轄權，只係強調本港機構收集個人資料必須述明用途，必須獲得當事人明確同自願嘅同意。
計功夫茶話齋，即使私隱專員公署真係冇法理依據追究內地奸商，不過係咪可以同內地政府聯絡，攜手合作想想辦法杜絕一蚊雞賤賣私隱呢？內地政府冇嘢叻，維穩工夫最耍家，功夫茶唔信國產官僚冇能力殲滅侵犯私隱嘅奸商囉。你知啦，內地網站一旦出現敏感詞彙都會馬上被屏蔽，公然兜售個人資料呢家嘢，冇理由逃得過網上警察嘅法眼啫，吓話！
內地奸商侵犯私隱，香港亦好唔到邊度，私隱專員公署發現一個名為「起你底」嘅手機應用程式，聲稱有二百萬宗訴訟及破產案件嘅紀錄，用戶可以輸入目標人物嘅姓名、部分身份證號碼或者地址等等，搜尋對方是否有訴訟或破產紀錄。而類似涉嫌侵犯市民私隱嘅程式簡直數不勝數，防不勝防。
計功夫茶話齋，私隱專員公署固然有必要為香港人做好保障私隱嘅把關工作，廣大市民亦有必要捍衞自己嘅個人資料，慎防奸商起你底。簡單咁講，網上購物嘅時候小心小心再小心，畢竟蔣任宏唔係千手觀音，守龍門唔擔保唔屙蛋o架！