羨慕院友有啖好食
話說Michael上周五本來要去廣州一趟，不過出發前一日突然胃痛，要喺凌晨揸車去睇醫生，經醫生診斷後原來係急性胃炎，佢本來打算睇完醫生就返屋企，不過醫生勸佢要留院休息，前前後後住咗三日。
Michael話，佢入院後住四人房，原來想轉去二人房，不過因要排隊輪候所以作罷。
住院期間醫生叮嚀佢要戒口，所以嗰幾日佢見到隔籬病床嘅院友有好嘢食，好似有人食叉燒飯同咕嚕肉咁，翌日又有人飲奶茶同食奶油多，令佢覺得好羨慕，更加珍惜平常嘅食物。
問到兩個囝囝有無探佢，Michael話佢哋兩個咁啱都唔喺香港，出院後嘅第一餐就係食牛河同飲熱檸茶，又唔敢食菜，叫做已經跟足醫生嘅吩咐嘅嘞。