本港社運人士楊匡同內地維權人士劉沙沙呢對社運界「神鵰俠侶」前日終於「拉埋天窗」，不過呢段婚姻可謂一波三折，由喺公安車求婚、到傳出女方重婚疑雲，即使佢哋結埋婚，都有報料話佢哋嘅婚姻無效，聲稱劉沙沙同楊匡嘅擬結婚通知書張貼最後一日，有人畀料婚姻登記處，話原名劉琳娜嘅劉沙沙曾經喺內地結婚又未離婚，簡單講即係唔結得婚，而立法會議員何俊仁明知都仲喺前日幫佢哋證婚，即係連佢都有問題啦。
不過事實原來無咁複雜。呢對俠侶之前都確有各自嘅婚姻，不過男方早排喺香港搞掂咗離婚手續，女方據知十幾年前亦已經喺內地搞好晒離婚嘅程序，文件嘅正本都畀過律師同婚姻登記處過目，據知亦冇人向登記處「反對」呢段婚姻。既然男可婚、女可嫁，佢哋兩人當然可以有情人終成眷屬啦！
我哋亦向何俊仁查詢過，佢就話作為婚姻監禮人，冇辦法「千分之一千」證明所有文件嘅真偽，但睇過晒文件，一對新人嘅舊婚姻，「表面上解決咗」。