政情：遏公僕加薪 官「威」蓋行會

死跟機制 埋政治炸彈

據說喺行會之內，支持加薪高過指標嘅包括羅范椒芬、葉劉淑儀等嘅前公務員，仲有來自工會嘅鄭耀棠，就算係李國章、張志剛，都有相同意見，點知當日就算投埋票，都贏唔過鄧國威。事關鄧國威一早成功游說特首梁振英，仲向傳媒放晒風，話只能跟機制加薪，而梁振英咁啱去咗美國訪問，當日主持行會會議嘅係政務司司長林鄭月娥，於是拍板嘅內容，只能跟機制去做，一切不變。

不少行會成員喺會上力諫，認為公務員怨氣一旦上升至極點，政府要付出嘅代價更大，但鄧國威始終唔理政治形勢。有人分析指，鄧國威心中嘅盤算，係估計公務員加薪一事唔會有普羅大眾支持，所以睇死公務員唔敢搞遊行，最多嘈幾日就收手，所以鄧國威抱住「過咗海就神仙」嘅諗法，懶理埋下無數政治炸彈，一心一意向梁振英同行會成員箍票。

有了解情況人士到最近講起件事都仍然好肉緊，佢話鄧國威「堅定」到就算加薪方案去到立法會財務委員會投票，有議員問佢，明年加薪時會否考慮埋公務員嘅士氣問題，畀張好牌佢上，點知佢都只係答話跟機制去做啦，點都唔肯講得彈性一啲，真係畀佢激死。於是大家懷念起前任公務員事務局局長俞宗怡（D姐），認為D姐嘅政治手腕，比起鄧國威不知強幾多。

警察員佐級協會建議加薪百分之七雖然係獅子開大口，但同後來嘅加薪結果又確實相差太遠，咁嘅情況下，差人心中有怨氣自不待言。不過加薪年年有，唔知特區政府會唔會吸取教訓，明年加薪時，有唔同嘅評估呢？