中環出更：EQ遊柏林激讚手機租單車
立法會議員葛珮帆（EQ）早前同老公去咗德國柏林玩，佢話自己非常欣賞柏林嘅自助單車租用系統，當地市民只要一打開智能手機入面嘅應用程式，就可以搵到邊度有單車可租，仲可以即時完成租用同付款過程，比英國嘅倫敦及中國嘅杭州嘅單車租用系統更加先進方便。
善用天橋底 香港可借鏡
EQ話，柏林政府視單車為市民日常交通工具，喺城市規劃時特別考慮單車路嘅位置，亦為單車設專用嘅紅綠燈，而柏林政府亦善用橋底空間，容許酒吧、餐廳同商店租用橋底位置，等佢哋可以有多啲地方做生意。特區政府成日話唔夠地方，EQ建議香港參考外國例子，利用天橋底釋放更多空間。
柏林近年流行健康綠色飲食，唔少餐廳標榜低碳烹調，大量採用本地新鮮食材同合時蔬菜，以少油少調味方式突出食物本身鮮味。EQ話，有餐廳用上十幾款蔬菜、鮮花同果仁炮製熱菜沙律，話自己咁大個都未食過咁多鮮花喎。