中環出更：名人撐保良仔女捐款支持
為咗每年一度嘅籌款節目，保良局董事會成員尋日出席宣傳活動呼籲各界慷慨解囊。雖然籌款大騷係下個月嘅事，不過部分董事會成員嘅仔女就帶埋支票嚟撐場，一於用行動支持父母嘅善舉。
有份捐錢畀今次籌款節目嘅保良局副主席蔡李惠莉，佢囝囝蔡加讚(Karson)就擔任冠名贊助，一於母子做善事齊齊拍住上。Karson就快做「老襯」，不過有關婚禮嘅安排就無暇細顧，只係話想到較為溫暖嘅南半球蜜月旅行咁話。佢又話早幾日趁着工作空檔，同媽咪及未婚妻汪圓圓到吉隆坡玩咗三日，遍嘗特色美食。
鄭泳妮創 「雪中送炭」生意
保良局主席鄭錦鐘囡囡鄭泳妮（Vene）就奉上六位數字嘅支票。Vene近來正忙於創業，成立一間「無啦啦」有限公司，專門經營網上購物。佢話好多人送禮都係為喜慶事錦上添花，而佢嘅生意則反其道而行，為種種失意事設計一系列小禮物，例如一經點燃就象徵燒去不快事嘅蠟燭，或者抹掉錯誤嘅擦膠等。Vene話呢門「雪中送炭」嘅生意構思經年，除咗得家人嘅支持，仲有近百位朋友嘅義務相助，並打算於下個月正式營運。
保良局總理紀寬樂醫生就帶同佢十四歲嘅囡囡Jasmine出席活動。紀醫生話暑假過後，Jasmine就要到澳洲求學，紀醫生自己年少嘅時候，因留學之故曾經喺澳洲生活十多載，對於彼邦嘅風土民情知之甚詳，所以為愛女揀選放洋留學之地，澳洲就係不二之選。紀醫生又話，雖然Jasmine嘅獨立能力唔錯，然而天各一方，點都有啲唔捨得。
卓妮