國產奶粉靠得住，豬乸肯定會上樹，所以香港成為國內同胞瘋狂搶購奶粉嘅消費樂園。之不過咁，本地媽媽買唔到優質奶粉始終係一個頭痛問題，所以導致特區政府急急腳推出限奶令，防止水貨客搞到土生土長小寶寶陷入斷奶危機。
當大家都崇尚外國奶粉不含三聚氰胺嘅時候，晴天忽然響出一個大霹靂，全球最大乳製品出口商恒天然集團爆出醜聞，懷疑生產線受污染而令到原材料含有可致命嘅肉毒桿菌。新西蘭方面證實，八百幾噸乳製品含菌，受影響嘅六個國家包括中國、澳洲、馬來西亞、沙特阿拉伯、泰國以及越南。好衰唔衰香港亦係無辜波及嘅受害者，牛欄牌兩批次奶粉共十四萬罐必須回收，當中八萬罐已經流入市面。亦即係話，香港或者已經有小寶寶飲用過有問題嘅奶粉，後果可大可小o架冇陰功！
好嘞，國產奶粉靠唔住，外國奶粉有問題，食環署係咪應該密鑼緊鼓驗屍咁驗呢？弊就弊在港產官老爺一向死蛇爛鱔，佢哋話下游追蹤好似大海撈針喎，不符合成本效益，所以只會向新西蘭政府以及恒天然集團跟進事態發展，從源頭追蹤產品去向咁話。由於呢一個講法實在太不負責任，輿論猛烈批評再加上風波愈鬧愈大，食環署終於頭耷耷跪低，宣布食安中心會從市面抽取新西蘭製造供一歲以下嬰兒食用嘅奶粉樣本，以檢測有冇受肉毒桿菌污染，預料幾星期有結果。
對於食環署前倨後恭嘅反應，民間有乜嘢睇法呢？「東方報業民意調查」顯示，三成七受訪者認為當局嘅反應同市民嘅期望有落差；三成五直斥政府對問題掉以輕心；兩成一批評食環署當初明知影響大亦不抽查係本末倒置。
講真吖，人哋恒天然已經被指有隱瞞之嫌，食環署依賴源頭追蹤有信心保證咩？四成七受訪者就覺得，當局應該主動抽查市面相關產品；兩成五批評政府欠缺積極性；一成九質疑食環署根本難以掌握準確訊息。
其實檢驗奶粉呢家嘢，港產官老爺應該駕輕就熟吖，畢竟中國製造嘅毒奶風波係非常深刻嘅教訓，驗奶可以話係經驗豐富。所以咯喎，三成六受訪者不滿食環署今次未有盡力堵截問題食品；兩成六批評局方冇吸取過往教訓；兩成五狠批把關失守一錯再錯。
計功夫茶話齋，食環署一眾官僚大概係豬乸託世，要佢哋爬上樹唔係話唔得，有相當難度咁解囉。豬乸幾時先至可以上樹呢？踢一踢，爬一爬，踢到佢屁股痛嘅時候，話唔定終於有一日成功。
總而言之，洋奶粉都靠唔住，食環署豬乸上樹，大家一齊用力踢！