港府自上任一年多以來，問責官員逐一受靶。首先喺上個月嘅香港大球場草地變泥濘嘅「爛地」事件，港府就搵民政事務局局長曾德成孭飛，特首梁振英（CY）捉埋曾德成去視察球場，唔准佢匿埋扮唔關佢事，曾德成晚上即刻見傳媒交代球場維修及管理等問題。而呢期即將受靶嘅，就輪到教育局局長吳克儉，皆因CY今日會要求吳克儉提交有關小學教師林慧思爆粗辱罵警察事件嘅報告，推咗佢出台前。其實呢件事一直都無燒到去教育局，依家又關埋局長事，唔知佢份報告寫啲乜至啱呢？
