民主黨（白鴿黨）主席劉慧卿同立法會議員何俊仁日前先後發表「露底」言論，自揭政改立場底牌，即時畀其他泛民黨派鬧爆。白鴿黨尋日開記者會，名義上係宣傳該黨今日出發嘅台灣考察團，不過實際上係想幫兩人解畫。副主席蔡耀昌（狗哥）話兩人只係發表個人意見，其言論並不代表白鴿黨立場。吓，乜咁都得？
狗哥解釋，公民提名現階段只屬抽象概念，具體運作細節未定仲要傾。佢之後愈講愈嬲，話睇唔到白鴿黨有違反真普聯原則，批評有人企圖扭曲該黨言論，都唔知係咪想製造泛民分裂。其實民主黨唔入真普聯，咪唔使咁辛苦囉。
卿姐下晝出席活動時再解畫，話即使最終政改方案冇提到公民提名，都唔代表選舉唔符合普及而平等嘅原則。至於點先可確保選舉符合「普及而平等」，卿姐淨係爆咗句「全世界有公民提名嘅地方只得兩個」。唔知佢今次所講又代唔代表該黨立場呢？