政情：費盡唇舌 張建宗愛「莫」能助
勞工及福利局政治助理莫宜端（Zandra）辭職惹來問責制高官「跳船」疑雲，Zandra做勞工及福利局局長張建宗嘅政助做咗四年幾，原來張建宗為呢件事同Zandra傾咗幾個月，最終都未能打動對方，令佢留低。
張建宗尋日話，Zandra的確係因為想多啲時間做個好媽媽，照顧年幼嘅仔女先辭職，唔涉及政治因素，叫大家唔好多作揣測。張建宗尋日出席一個公開活動後話，過往同Zandra合作無間，對佢辭職好惋惜，「知道佢（莫）呢幾個月為呢件事好煩惱，要兼顧兩者（工作同仔女）好困難，同佢傾咗幾個月，多次挽留佢，但佢作咗決定。」
陳岳鵬稱自己唔「跳船」
政制及內地事務局政治助理陳岳鵬就話，莫宜端辭職無影響佢哋政助嘅士氣，又強調自己唔會「跳船」。對於加強版嘅利益申報機制，佢話自己個局管政制、內地事務同人權，利益衝突機會細，所以唔怕上身喎。