政情：星洲恥笑港淪「BMW」之都
「BMW」呢個字眼，近年頻頻喺香港報章出現，成為潮語。講緊嘅並唔係名牌靚車，而係「Blame My Wife」嘅英文縮寫，形容男人縮骨卸膊，將錯誤嘅責任歸咎於太太。無他嘅，前朝「貪曾」前特首曾蔭權爵士在任時，已開創「BMW」先河。尋日新加坡主流報章《海峽時報》（The Straits Times）刊登嘅一篇有署名文章，都恥笑香港已淪為「BMW」都市。貪曾影衰晒香港男士形象，又佗衰埋香港，搞到香港畀主要對手嘅主流報章笑，由貪曾擔任「BMW」會長，實在當之無愧！
「太太多衫」貪曾平租豪宅
該篇署名評論文章，作者係香港特派記者，據知佢亦有喺英國報章撰文。佢指，港府高官接二連三惹上官非，不約而同搵太太做「擋箭牌」，最少有四個典型人辦。
貪曾可謂「BMW」始祖，去年初佢仍然在任時，被東方報業集團揭發佢計劃於退休後，以超平價租住深圳禮賓府東海花園豪宅，當被質疑為何要住內地咁大間豪宅，貪曾話「想遠離香港政治」，呢個理由本來已經好充分，但佢居然搬埋老婆出嚟，話因為「太太做女時嘅衫都留低」，「兩夫婦收藏好多衣服雜物」，咁冇腰骨，結果當然成為公眾笑柄啦！
唐唐陳茂波林奮強鬥卸膊
前朝貪曾「BMW」功力咁深厚，其「真朋友」前政務司司長唐英年，亦將「BMW」發揮得淋漓盡致，最後累埋太太負上刑責。佢喺去年參選特首選舉期間，捲入唐宮僭建地庫風波，結果一句「都係我太太嘅主意」，就將責任推卸得一乾二淨，成為「BMW」嘅佼佼者。之後又有發展局局長陳茂波，以及前行政會議成員林奮強，分別涉嫌囤地及偷步賣樓取利，二人不約而同指土地及樓宇業權由太太持有，雙雙成為「BMW」。
新加坡係香港嘅主要經濟競爭對手，今次咁高調踩香港，做香港人嘅都面目無光啦。「BMW」成為國際笑話，做幾多嘢都好難救得番喇。