政情：深入冰島睡火山「誌」難忘
香港夏天又熱又濕，唔少人都趁暑假歐遊避暑。東華三院總理王賢誌（Vinci）上月先飛英國出席親友婚禮，再相約友人同遊北歐冰島六天，去勻瀑布、噴泉、冰川、溫泉同火山五大奇景，最難忘係深入相等於四十層樓高嘅Thrihnukagigur睡火山深處，驚嘆大自然之奇妙。
藍潟湖浸溫泉勁歎
Vinci話，呢個睡火山係世界上唯一開放供遊客參觀內部嘅睡火山，火山口仍然保存得好好。不過要深入火山並非易事，Vinci與友人攀山越嶺，幾經辛苦先至上到火山頂部，再坐吊橋進入。佢完全唔擔心火山爆發，事關上一次爆發，已經係四千年前嘅事。此行佢仲喺接近零度嘅天氣，去景色優美嘅藍潟湖浸溫泉兼敷面膜，之後又大擦海鮮，非常寫意。
首次遊冰島嘅Vinci笑言，可能冰島一年四季溫差大，令當地人特別有藝術靈感，街上隨處可見塗鴉創作，連民居都係五顏六色。佢話，當踏進一片白色淨土，望見因全球暖化而慢慢融化嘅冰川，令佢引發起無限反思，更加珍惜一草一木。