政情：三商會女CEO 無官一身輕
依家政治環境愈來愈複雜，做官已冇晒官威。回頭望，前幾年不約而同離開政府「熱廚房」嘅香港總商會總裁袁莎妮（Shirley）、香港工業總會行政總裁蘇家碧（Linda）及中華廠商聯合會行政總裁黃靜文（Adeline）真係有遠見。上周五中午，三位商會靚女CEO相約喺中環一間環境幽靜嘅意大利餐廳飯敍，話題天南地北，但講到健康，最有共鳴。
上個月啱啱重出江湖嘅Adeline笑稱，新工作同昔日做官最大不同，係新工「包伙食」，有時一日包足四餐添！此言一出，Shirley及Linda好有共鳴，事關佢哋每天都要應付不完嘅工作飯局。去年七月出任工總CEO嘅Linda就「投訴」話，佢原本身體各項指標都好「靚仔」，不過返新工冇幾耐竟然驗出膽固醇超標。
重視健康 Keep得唔錯
Adeline聽完好驚，笑笑口話要快啲去驗身，知道自己各項指標嘅「起點」喺邊度，事關廠商會嘅會董們出晒名感情融洽，除咗對外嘅應酬飯局之外，仲經常自己人聚會開餐，容乜易就超標。三位靚女咁重視健康，難怪身形及容貌都保持得咁好，睇唔出佢哋都已經打政府工近廿年。
Shirley加入香港總商會話咁快已兩年。佢話，當年自覺喺政府好多部門都做過，好滿足，所以就決定「吸啖氣，走！」後來機會出現，佢認為代表商界坐喺昔日同僚嘅對面，既有挑戰又有信心勝任，所以毅然加入總商會。Shirley唔覺意開創前女AO做商會CEO先河，依家四大商會中，已有三個由前AO揸弗，唔知中華總商會有冇興趣物色一位前AO幫手呢？