沒有最爛，只有更爛，當你以為《蘋果日報》已經爛無可爛，原來係可以爛上加爛o架，該煨！
爛果報最新嘅爛鬼行為係咁嘅，內地前記者李建軍日前帶同文件去到香港廉政公署同警方商業罪案調查科，舉報華潤集團有人涉嫌貪腐，點不知爛果報加鹽加醋，誣稱李建軍爆料話事件涉及多名中央高層。簡單咁講，李建軍冇錯係舉報有人涉嫌貪腐，不過冇講過中央高層支持相關人士，爛果報將坊間傳聞當爆料，屈佢食死貓。
李建軍擔心爛果報嘅老屈影響佢嘅人身安全，害到佢無法返回內地，甚至惹人誤會慘遭報復，所以前日親身走去爛果報總部門外靜坐，要求對方解釋，還佢一個清白。哈，壹淫媒果然係名不虛傳嘅傳媒敗類，爛果報不但將李建軍拒諸門外，更加派出攝影記者不停拍照，都唔知有乜意圖，最後有警察接報到場話佢阻塞交通，勸喻李建軍離開。
喂喂喂，人哋係要伸冤討公道，一向自鳴清高嘅爛果報係咪應該畀人一個合理解釋呢？事實剛剛相反，爛果報唔尊重李建軍嘅人權，唔為佢平反冤案之餘，更加利用警察提供維穩服務，打壓冤民嘅手法同內地官僚如出一轍。
嗱，繼前日靜坐抗議之後，李建軍尋日又公開宣讀聲明，譴責《蘋果日報》極不負責任，為吸引眼球不惜歪曲、捏造事實，甚至對新聞當事人進行構陷，完全違背新聞操作規範，踐踏新聞倫理道德，佢對此表示極度不滿及譴責，除咗會向新聞團體投訴，仲保留一切法律追究權利。
所以話，壹淫媒簡直係香港傳媒嘅癌細胞大毒瘤，遲早好似內地官方喉舌一樣，除咗日期之外冇一句係真話。功夫茶記得，爛果報創刊初期誓神劈願話要建立公信力，問題係過咗咁多年嘞，真相何在？公信何存？打從陳健康事件開始，壹淫媒以及爛果報幾乎就等於弄虛作假嘅代名詞，慘遭老屈嘅受害者不計其數。
今年初之嘛，當時嘅行政會議成員林奮強講過「我完全唔係歧視新移民」，點知被爛果報老屈為「我完全係歧視新移民」，顛倒是非，問你服未。
話時話，爛果報嘩眾取寵，謊話連篇，醜聞又點只咁多。就講近日咋，失實報道一單接一單，除咗李建軍上門譴責之外，有份發起撐警方集會嘅香港家長聯會會長李偲嫣亦向爛果報發出律師信，要求就連串對佢嘅抹黑及人身攻擊道歉。仲有吖，民間機構一國兩制研究中心亦發表聲明，指《壹週刊》日前針對該中心嘅報道嚴重失實，表示會轉交律師處理，追究責任。壹淫媒唯恐天下不亂，簡直係鑊鑊新鮮鑊鑊甘。
示威者遞信請願嘅時候，若然官老爺唔肯接信，爛果報九成九會口誅筆伐，點解依家自己又扮龜縮呢？呢家嘢咪就係雙重標準囉，一旦自己火燒後欄，淫賤傳媒嘅嘴臉仲差過狗官o架咋！