發展局前局長麥齊光上任十二日，即被踢爆欺騙租金津貼而辭職落台，尋日被法院判罪成。佢尋日知道自己被判緩刑，即時笑逐顏開，但最慘嘅莫過於路政署助理署長曾景文，明明無入熱廚房、無做梁粉，卻無辜辜惹上官非。
尋日麥齊光事後同記者講，話會當曾景文係一世朋友，或者呢句說話對曾景文嚟講「太言重」，搞到曾景文全程啞口無言、目光呆滯。咁又係嘅，如果幾十年前唔係同麥齊光分屬朋友而互租單位，今日又點會搞到咁下場？如果可以從頭嚟過，我相信曾景文會選擇唔去識呢位朋友，但世事又點可盡如人意呢？唉！
