本港社運人士楊匡同親密戰友、內地維權人士劉沙沙呢對社運界嘅「神鵰俠侶」上月喺社交網站分享佢哋所在地點為尖沙咀婚姻登記處，其中楊匡又話好開心、好開心，大家梗係以為佢哋已拉埋天窗，點知原來佢哋今個星期先真係結婚。不過，繼楊匡被踢爆曾結婚後，我哋尋日收到有人報料，話原名劉琳娜嘅劉沙沙其實已婚，且尚未離婚。若真有其事，咁呢對情人點算呢？
楊匡回應我哋查詢就話，佢知道劉沙沙曾結婚，但係好多年前嘅事，所以唔想再提喎。咁劉沙沙辦好離婚手續未呢？楊匡就只話如果唔合資格，入境處都唔會畀佢哋結婚喎。而劉沙沙方面，我哋就未能聯絡上。
就中港婚姻問題，法律界人士黃國桐話，入境處其實查唔到內地人嘅婚姻狀況，但如果已婚人士發誓瞞過港府重婚嘅話，隨時犯下三宗罪，包括重婚、發假誓及提供虛假資料。我哋翻查《侵害人身罪條例》，任何重婚人士可處監禁七年，但如果喺過去七年，當事人丈夫或妻子失蹤，又得唔到佢在生嘅消息而再婚嘅話，咁當事人就唔算重婚。