政情：「幫港」反佔中 學者大鬥法
由港大法律學者戴耀廷等三人發起嘅佔領中環行動正搞得如火如荼，尋日有一個「幫港出聲」行動出現，宣布主力透過社交網站爭取十萬人發聲，喺Facebook搜尋Silent Majority就搵到佢哋。六名召集人中有兩人都有學者背景，發起佔中亦有兩名學者，好明顯係以學者對學者。
「幫港出聲」行動由約四十名學者、商界同專業界別人士發起，其中資深傳媒人周融、中大客座教授鄭赤琰、嶺大公共政策研究中心主任何濼生、廣東社團總會主席王國強、金匯國際集團有限公司主席馮家彬及創新科技協會會長李榮貴六人為召集人，其中後兩者都係自由黨成員。
「幫港出聲」係突然爆出，因為佢哋喺六月下旬先開始醞釀，事隔一個多月後正式成立就籌到一百多萬元。周融強調，「幫港出聲」成立前無同中聯辦「打招呼」，又發表「正邪論」自言想香港穩定就係「正」，想攪亂香港就係「邪」，「幫港出聲」能否殺出一條反佔中血路，就要睇吓之後有乜奇招喇！