政情：四散人等散檔
發展局局長陳茂波被指喺新界東北發展上爆出利益衝突疑雲，去到立法會只得保險界嘅陳健波幫口撐佢，其實陳茂波仲喺立法會做議員時，二波同工業界林大輝、醫學界梁家騮同資訊科技界譚偉豪組成「五散人」，不過時移世易，到依家已經各走各路嘞。就算呢屆立法會加入咗建築、測量及都市規劃界謝偉銓，散人組織都已經名存實亡。近日陳茂波爆出利益衝突疑雲，更令四散人出現內部矛盾，實際上已近乎散檔，隨時會畀其他政團收購合併，從此喺政壇上消失。
五散人提早散檔嘅故事，要由去年嘅特首選舉開始講起。當時外號「唐英年家臣」嘅林大輝，喺議會內外力撐唐唐同狂插另一候選人梁振英（CY），已令其他四位想保持相對中立嘅散人敬而遠之。其後CY擊敗唐唐當選特首，大輝立志轉攻直選改行插政府路線，進一步影響改組後嘅四散人合作，以前每逢施政報告同財政預算案，各名散人齊齊開記者會回應嘅場合已經不復再。
傳林大輝陳健波無偈傾
佢哋嘅前成員陳茂波爆出利益衝突疑雲，就將大輝同陳健波嘅內部矛盾表面化。大輝雖然未有直接叫茂波下台，但就公開狠批對方回應「擠牙膏」，同茂波仲係好老友嘅健波，話無證據證明茂波以權謀私做錯嘢，多次為好友護航。據聞兩人現時已幾乎無偈傾，以往本來每個禮拜定期舉行嘅散人例會，但最近已無聲無息下取消咗。
怪醫或唔選 偉銓恐被撬
另一個加速四散人散檔嘅原因，就係「怪醫」梁家騮喇。怪醫喺上屆立法會已經行蹤飄忽，成日唔開會，今屆佢開咗間私家診所同榮升爸爸之後，缺席情況愈趨嚴重。有傳佢已經諗定下屆唔選，專心搵銀同湊仔，無咗怪醫擔當大輝與健波之間嘅「潤滑劑」，散人開會時難免有拗撬。
至於新加入嘅謝偉銓，據聞佢同健波合作得唔錯，可惜健波亦好可能玩埋呢三年就唔撈。謝偉銓具備專業背景，又熟悉地產事務，一直畀新民黨同經民聯「吼實」，隨時未換屆就會畀人撬走，令四散人正式散晒。