中環出更：梁福元最愛餅舖搵「老婆」
元朗恆香老餅家總店重修後日前開張，作為地膽嘅新界鄉議局執行委員梁福元都有出席。佢好回味咁話，餅家未賣餅之前係茶樓，佢最鍾意晨早去完雞地趁墟之後，過嚟歎番件大包同馬仔。後來茶樓冇咗，佢都有繼續幫襯，笑言最愛喺呢度搵「老婆」，不過係食得嗰隻老婆餅。
自爆曾對餅家有恩
梁福元話，老婆餅係元朗特產，亦係元朗人嘅象徵，佢不時到內地拜訪領導，都係抽住一盒盒老婆餅做手信。佢自爆曾經做過餅家嘅「恩人」，話說當年政府興建十八鄉公路，將餅家嘅製餅廠房劏開，餅家向梁福元求助，佢於是喺區議會上動議修改工程路線，最終獲通過。
之前屢傳恆香總店結業，今次店舖以行動粉碎傳聞。現為最大股東嘅恆香總經理黎卓婷（Crystal）話，唔少歷史悠久嘅本地品牌已經沒落，佢頓覺可惜，希望未來將餅家發揚光大。《商品說明條例》修訂實施後，唔少貨品都怕觸犯條例而要易名，Crystal就覺得老婆餅冇需要改名：「係人都知道老婆餅入面冇老婆啦！」
卓妮