中環出更：緊貼新Apps 伍偉國搶佔先機
事業有成嘅人梗係要洞悉先機，作為家族第三代掌舵人嘅美心集團主席伍偉國（Michael）唔單止喺事業上推陳出新，連下載手機應用程式都要快人一步。日前一個下午，卓妮喺中環ifc一間電子產品旗艦店遇到Michael，當時佢手持該品牌嘅智能手機與店員傾偈，睇嚟係講緊有關手機嘅嘢。
當日下午大約兩點半，西裝骨骨嘅Michael一支公現身ifc，佢一手挽住個購物紙袋，一手翹住把雨傘。卓妮見佢行入電子產品旗艦店，店員即時笑面迎人咁上前招呼佢，似乎佢係熟客。Michael喺西裝褸袋內掏出智能手機，同店員一邊熱烈討論，一邊研究手機，期間仲講到手舞足蹈。
最近忙試食 改善集團質素
卓妮上前同Michael打招呼，問佢同店員傾啲乜？佢話自己不時經過該店，都會順便入去問吓最近有乜最新推出嘅手機應用程式、新產品等等，乘機學多啲嘢咁話。Michael透露，最近依然馬不停蹄，到唔同類型嘅餐廳試食各種美食以作參考，務求改良集團嘅食物質素。
未幾，Michael離開該店，又喺商場內閒逛咗一陣，途中經過一間洋酒專賣店，佢駐足對住櫥窗望咗幾眼，但冇入到去。之後佢繼續向前行，兜咗幾個圈，冇幾耐就離開。
卓妮