人一出世就要飲奶，最好當然係偉大媽媽提供愛心母乳啦。不過現代潮媽個個千頭萬緒唔得閒，唔係要返工就係有幾百萬件事等住佢哋去做，所以奶粉成為小寶寶必不可少嘅生命泉源。令人傷透腦筋嘅係，究竟應該買邊一隻奶粉好呢？
呢嗱嗱嗱，大家都知道國產奶粉唔可靠，三聚氰胺之類嘅化學物質隨時害到小寶寶變成結石怪嬰，於是乎外國進口嘅洋貨就成為媽媽爭崩頭嘅首選，而香港作為正貨之都就係水貨客嘅兵家必爭之地，仲搞到中港矛盾水深火熱添。弊就弊在家陣傳出一個晴天霹靂嘅壞消息，外國進口嘅洋貨居然一樣有問題！
新西蘭嘅恒天然集團係全球最大乳製品出口商，佢哋嘅原材料被驗出含有肉毒桿菌，相關奶粉必須下架回收。肉毒桿菌風波禍及香港，深受本地媽媽歡迎嘅牛欄牌「大仔奶粉」懷疑採用受污染嘅恒天然原材料，兩批次合共十四萬罐必須回收，當中八萬罐已經流入市面，恐怕有小朋友中咗招，真係冇陰功。
正如學者話齋，肉毒桿菌係一種生長於常溫、低酸同缺氧環境嘅革蘭氏陽性細菌，產生嘅神經毒素可引致中毒，無論係初生嬰兒、兒童或者成年人，一旦誤服肉毒桿菌嘅毒素都足以致命。
網上親子討論區有媽媽留言，話自己個女食用其中一個批次嘅牛欄牌奶粉，佢講得非常悽慘：「六合彩頭獎又唔見我中，反而中埋晒唔好嘢，點解呀？」
係囉，點解呀？內地奸商賤格係人都知，因乜事幹連新西蘭嘅乳製品都有機會令人中毒o架？可憐天下父母心，家陣簡直係「無乳問蒼天」，點解呀？點解呀？點解呀？點解華洋奶粉賤鬥賤呀？
食物安全中心話喎，疑受污染產品或陸續有來，但目前唔會全面化驗，因為乳清蛋白可製造多種食物同埋體育飲品，下游追蹤有如大海撈針，不符合成本效益，現階段會密切監察恒天然嘅調查進展，從源頭追蹤產品去向。功夫茶奉勸港產官僚一句，千祈唔好掉以輕心，必須做好把關工作，出盡飲奶之力為本地媽媽捍衞權益。你知啦，本地媽媽含辛茹苦為香港低無可低嘅出生率獻上一己綿力，正所謂無功都有勞，若然買奶粉都唔知點算好，官老爺懶懶閒由得佢哋自生自滅，話唔定又會成為另一股反政府力量。特區政府民望已經夠低o架啦，冇理由想再因為監管奶粉不力而進一步惹人討厭吖嘛。
簡單咁講，麻煩食安中心醒醒定定，華洋奶粉都要金睛火眼目及到實一實，務求「有奶便是娘」嘅講法唔會淪為「有奶便無良」！