政情：去完禪修陳維安改食齋
夏日炎炎，立法會秘書長陳維安（Kenneth）就趁立法會放暑假期間去咗剪頭髮，兩鬢剷青、清爽咗，佢仲笑言呢個係「食齋頭」喎。話說Kenneth喺五月立法會就政府財政預算案拉布之後去咗禪修，食咗幾日齋，之後佢就決定改食齋喇，唔通拉布令佢有感而發，變得清心寡慾？
其實Kenneth過往都禪修過幾次，但佢五月去完之後就突然覺得食齋「幾舒服」，於是就開始「齋戒」。不過，佢仍然會食蛋同飲奶，事關「唔飲奶就冇得飲咖啡o架喇！」佢屋企人似乎就冇特別遷就佢，平時喺屋企食飯最多只係煮多碟菜啫。
拒回應會否重返「熱廚房」
立會正向政府申請增撥資源增聘人手，但Kenneth話請議會秘書好難，因至少要六年工作經驗，所以去大學搞簡介會係多餘，所以依家要研究點樣可以吸引到人早啲入行。曾任教局副局嘅Kenneth離開政府呢一年，已有多名問責官員因涉嫌有利益衝突而被人叫下台，會唔會令佢唔想重返政府工作呢？但佢就以秘書處要中立為由拒絕回應。