政情：行人專區淪噪音死結

鍾港武建議監管易拉架

現時旺角行人專區逢周一至周六下午四時至晚上十時開放，周日同公眾假期仲提早至中午十二時開放，對於有區議員代表難忍噪音轟炸嘅樓上居民，喺區議會一個委員會動議縮短行人專區開放時間至星期五、六兩日，唔少議員即使心入面支持，但都覺得呢招「太辣」，因為措施勢必引起喺專用區搵食嘅商戶、表演者甚至支持本土文化嘅團體強烈反彈，區議員咁大壓力下都唔敢貿貿然開綠燈支持動議。

油尖旺區議會主席鍾港武向我哋透露，有關建議實在好難達成共識，反建議政府修例、設附屬法例或設立發牌制度，規管表演者數量同出場時間，同時監管電訊商易拉架佔據專區嘅亂象，將個波踢番畀政府之餘，仲責難嘈咗政府咁多年，都係踢極都唔郁。鍾港武又話，即使政府願意修例，佢哋做嘢動輒都以年計，早已被內地旅客攻陷嘅行人專區，真係隨時爆煲喎。

唔想做醜人 逼居民硬食

另一方面，日前行人專區發生二千人就爆粗女老師事件對峙場面，如果區議會十一月開會貿貿然表決通過有關動議，一定會被扣上「打壓集會及言論自由」嘅帽子，亦無助解決同樣嘅鬧劇會喺星期五、六嘅行人專區重演。所以依家區議會同政府都唔想做醜人，拖得一時得一時，唔怪得行人專區咁多年來都係你有你投訴、我有我唱，咁搞法呢個不死結有排都解唔開，居民除咗「硬食」仲可以點？