政情：機管局ＣＥＯ：邊個話我唔續任
香港機場擬興建第三條跑道，以紓緩本港將近飽和嘅載客量，機場管理局行政總裁許漢忠近日經常出席公眾論壇，聽取市民對興建新跑道嘅建議。
早前有報道話許漢忠於今屆任期屆滿後將不再續任，仲話機管局稍後會展開全球招聘接班人。問許漢忠係咪真有其事？佢自覺好笑話：「邊個話我唔續任？我年頭先續完約，仲有年幾任期，依家講續唔續任，言之尚早喎！」
指英希思路機場管理差
本身經常坐飛機嘅許漢忠，見識過世界各地嘅機場，佢覺得最差嘅一次航空經驗，係喺英國希思路機場，地方細之餘仲管理混亂，經常遺失乘客嘅行李。另一個較差嘅機場就係印度機場，佢話當地設施好簡陋，事關每日航班好少，但亦有好處嘅，就係手續處理快捷得多囉。