政情：中環出更：海外學生撐仁濟籌款
外圍經濟市道淡靜，令慈善團體今年籌款難度增加，仁濟醫院就好彩有班海外學生幫手，利用暑假返港積極籌款及探訪，用汗水換來一百七十萬元善款。日前舉行嘅「海外學生仁濟夜」慈善餐舞會上，學生會就將籌得嘅大支票移交予仁濟主席梁昌明。當晚仲有拍賣環節，總理鄧肇殷（Erica）嘅媽媽兼卓悅集團副主席葉鍾佩雲，出手競投曼聯球星簽名球衣，以行動支持愛女做善事。
身為「仁濟夜」副主席嘅Erica，當晚一早就到場打點，佢啱啱同家人去西班牙旅遊，叉足電後又埋首工作。最近零售市道吹淡風，Erica話，旗下集團近期不時喺全線分店推出超抵價商品，例如一蚊一支名牌洗頭水，人潮多到爆。講起前仁濟主席李文斌及太太Amanda再次添丁，Erica話仲未去探BB，但已趁去西班牙旅行時買定禮物喇。當晚到場嘅仁濟人仲有副主席蘇陳偉香、嚴徐玉珊、馮卓能及王賢訊，仲有總理朱德榮及陳李詠詩等人。
嚴玉麟夫婦瞓身做善事
嚴徐玉珊嘅丈夫嚴玉麟（Stanley）及囝囝嚴子杰夫婦都有去捧場，依家個個呻生意難做，Stanley間上市公司時捷集團日前就逆市發盈喜，預期盈利將有大幅增長，事關佢食正潮流條水，係智能手機主芯片、記憶卡、顯示屏及視像鏡頭等「靈魂」零件供應商，難怪訂單接到手軟。咁佢咪要捐多啲做善事？做過仁濟主席嘅Stanley笑稱，佢同太太接力加入仁濟董事局超過二十年，未來梗係繼續瞓身支持。
卓妮