政情：公民講場：病入膏肓 香港未知死

要滅亡，必先瘋狂。香港或者已經屬於病入膏肓狀態，平時支持政府與反政府嘅市民互相交鋒，就算雙方有衝突，都唔會好似前日西洋菜街大混戰咁，完全陷入失控邊緣，連負責主持公道嘅警察都難以履行職務，任由兩批人士不斷「私片」。幾千人同時瘋狂爆粗，舉中指、無理謾罵、扣帽子，仲有你推我撞，完全將尊重、互讓、禮貌呢啲人類文明嘅特質拋諸腦後，恍如去咗蠻荒國度。或者香港呢個城市真係病咗，患咗躁狂抑鬱症，而且仲要病得好嚴重，最慘係病人患病而不自知，連醫生都鬧埋。究竟有乜嘢療法，可以令佢好番呢？