政情：林奮強加入插鬚大軍
財政司司長曾俊華（鬍鬚曾）幾時至肯開竅呢？又有人插佢喇。早前「梁粉」恒隆集團主席陳啟宗直斥鬍鬚曾理財無方，歷史會證明佢係香港嘅「大罪人」。點知鬍鬚曾就自我感覺良好，仲喺網誌撰文話熱切期待喺年底再一次估錯數，搞到前行政會議成員林奮強都忍唔住借兩位港英時期嘅財政司夏鼎基同麥高樂嘅言論，狂插鬍鬚曾墨守成規，攬住啲錢唔放︰「應使要使嘅未做得足夠，唔應該使又使，使咗嘅就做得太多！」
「量入為出」只堪作管帳人
陳啟宗早排批評鬍鬚曾未能做到應使則使，係「大罪人」，林奮強亦喺接受機構訪問、論及公共財政時狂踩鬍鬚曾。林奮強話，政府沿用多年嘅「政府開支佔本地生產總值兩成」根本就唔應該係硬指標，外國亦唔會視為金科玉律，係得鬍鬚曾一直盲目跟從。好似新加坡咁，雖然當地政府使多咗六成政府開支，但因為起好咗個頭，結果社會同經濟增長仲快過政府，政府喺社會同經濟方面嘅佔有率仲低咗。佢仲引述提出積極不干預理財政策嘅夏鼎基嘅說話，要規定公營部門相對體積嘅最高極限，事實上係唔可能嘅。
鬍鬚曾成日都話要量入為出，林奮強似乎就對此感到不屑。佢話量入為出嘅理財方式極其量只係一個管帳人，要成為優秀嘅財務總監，就應該盡量運用財政資源去為香港帶嚟最大收益，暗踩鬍鬚曾只係識望住盤數嘅守財奴。
「唔應使嘅就倒錢落海」
林奮強仲話麥高樂亦都曾經講過，相信市民寧願享有更佳嘅醫院、學校同社會服務，藉此分享香港經濟繁榮嘅成果，都唔想見到財政儲備不斷增加至超越審慎水平，變成「可笑的吝嗇」。
林奮強又話，喺鬍鬚曾嘅財政管理之下，香港正正就係應使不使，唔應使嘅反而係咁倒錢落海。就好似政府成日成立啲預付式基金或注資去公營機構，以為咁就可以當自己有增加開支，但公營機構因法例所限係唔能夠自行增加服務或開支，結果就令呢啲獲注資嘅機構成為無意義嘅小金庫。所以佢都係覺得，政府應喺醫療、教育、長者福利等社會服務加大投資、培訓人才，先至係有利於香港嘅將來。