中環出更：爆粗事件 佛教徒楊釗籲包容
一位老師、一句粗口，竟然引發三千人於旺角街頭互罵，商界對粗口文化又點睇呢？中華總商會會長楊釗好老實，佢話如果話畀人聽咁大個人一句粗口都未講過，就擺到明呃人啦，而佢自己有時都會因為對一啲事睇唔過眼而講粗口，總之佢認為講粗口要視乎咩場合，如果係公眾場合，又或者喺細路面前，當然唔應該講。
劉展灝憂礙商戶生意
講番前日場旺角街頭大罵戰，本身係佛教徒嘅楊釗認為，大家可以有唔同意見，但應該視對方為自己屋企人，有咩唔啱傾到啱。「就好似你爸爸、媽媽同你都會唔同意見，但唔一定要砌對方呀嘛。」
做廠多年見盡各階層人士嘅工總主席劉展灝都話，其實粗口呢樣嘢基本上活喺生活四周，例如喺茶餐廳食飯、坐巴士返工、行街購物都好可能聽到，根本毋須大驚小怪，只係講粗口嘅人係一名老師，大家先咁大反應。總之劉展灝就覺得警方唔應該批准喺行人專用區搞論壇，因為旺角地方淺窄，搞大型論壇唔止令雙方產生摩擦，仲會影響附近商戶生意添。