中環出更：巨吞拿空運抵港 李秀恒友得分
足足有成個人咁高嘅勁量級吞拿魚登陸香江，引入呢條巨魚嘅，就係識飲識食廠商會副會長李秀恒（Eddy）。有朋友同佢講話想食刺身，佢索性空運呢條重達六十八公斤嘅巨吞拿魚到港，用盡煎、炒、煮、炸加刺身方式烹調，廿個老友歎足一晚，依然食唔晒。
條吞拿魚來自東京築地，運抵香港一間日式餐廳後，Eddy即call齊成班廠商會好友開餐，包括副會長陳淑玲、徐炳光、楊志雄、德國寶老闆陳國民、前行政總裁梁世華及會董羅台秦等。巨魚「霸」晒成張壽司吧枱，眾人一睇，無不嘩然。
「展覽」完畢，刺身師傅手起刀落，花二十分鐘就劏好條魚，魚腩部分最肥美，做刺身一流；魚肩部分就炮製成香草吞拿魚燒，再加埋魚扒、魚湯、柚子吞拿魚沙律、魚手卷，總之食到大家舔舔脷。
Eddy食得招積，將魚骨邊嘅魚碎刮出嚟，加入京葱、海苔、沙律汁等，塗上法國麵包食，正斗到極。羅台秦就大讚新鮮刺身味道寧舍鮮甜，拖羅部位入口即溶。徐炳光都勁讚魚腩及半魚腩部分最嫩滑，回味無窮。
赴日考察 領悟新思維
狂掃一輪吞拿魚，仲有空運到港嘅日本岡山水蜜桃做飯後果，Eddy話，呢款水蜜桃正值時令，果汁香濃，呢個月唔食，就要等到明年先有嘞。安排咁周到，何解Eddy心情咁靚？原來佢日前去日本遊東京及大阪考察當地建築返港，為活化葵涌一幢工廈取經，佢話打破框框吸取新建築特色，思維豁然開朗，希望打造一幢具地標性嘅工廈。收穫咁豐富，值得擦餐勁啦。
卓妮