香港曾幾何時係所向披靡嘅亞洲足球王國，所以爛船尚有三斤釘，踢波波嘅腳法有番咁上下，發展局局長陳茂波最近領教過啦，只不過踢波波嘅目的唔係射龍門，而係大力金剛腿要踢佢落台咁解。
亞洲足球王國雖然已經淪落到好似魚腩部隊咁嘅款，不過觀眾熱情不減，尤其係外國勁旅訪港嘅時候，球迷通常都會排山倒海湧去球場一睹真正嘅巨星風采。無他嘅，食得魚腩多梗係想轉口味食一食魚翅啦，訪港嘅球隊即使只派出二打六後備球員上陣，水準一般都高過本地薑幾班。問題係，招呼外隊嘅場地假如蓉蓉爛爛，點算好呢？冇理由以咁不君子嘅手法夾硬降低外隊嘅水準啫！
剛剛有四支英超足球勁旅來港訪問，踢幾場表演性質居多嘅比賽，點不知惹來外國傳媒一片喝倒采噓聲，原因係香港大球場爛到好似「香港大農場」，有波牛之稱嘅球員簡直耕田咁痛苦，輕則食泥，重則受傷。負責管理嘅康文署係就係急急腳補鑊，不過補得不知所謂，填氹嘅沙粒居然冇篩走雜質，搞到大球場充滿碎石、貝殼甚至玻璃，有英超領隊忍唔住形容為「殺人球場」。
「東方報業民意調查」顯示，三成六受訪者直斥港府官僚作風，大球場管理不善；三成一覺得盛事變醜事，香港淪為國際笑柄；兩成歸咎當局長期對大球場老化問題視而不見。對於大球場嘅修補做法，三成三不滿一錯再錯，康文署愈搞愈亂；另外三成三質疑局方欠缺專業知識導致判斷有誤；兩成五認為必須改善應變機制。
計功夫茶話齋，大球場之所以咁爛，歸根究柢就係特區政府管理太爛所致。正所謂咯喎，工欲善其事，必先利其器，如果將康文署比喻為器具，呢一個器具目前嘅狀態就係鈍到冇朋友，接管大球場十年以來乏善足陳。要防止泥漿足球大爛地繼續令到香港家醜外傳，最佳解決方案係好好修理爛官僚，唔容許香港呢一個盛事之都爛尾收場！
何謂盛事之都呢？即係咁，曾蔭權爵士未被東方報業集團獨家連環踢爆一連串貪腐醜聞之前，呢一個前特首早於○九年成立盛事基金，聲稱協助非牟利機構籌辦有吸引力嘅文化、藝術及體育盛事，可惜唔少活動慘淡到拍烏蠅甚至不了了之。三成四受訪者就覺得嘞，當局宣傳不足，項目欠吸引力；三成三直斥效果成疑；兩成一認為係贊助目標欠缺客觀標準所致。
總而言之一句講晒，港產官僚若然唔接受修理改造再培訓，貪曾之流仍然好大喜功一味吹牛，每一項盛事都有潛質爛尾出醜！