所謂分久必合，合久必分，呢個定律套喺成日強調要齊心一意嘅愛字頭陣營一樣啱。愛港之聲自從由愛護香港力量分裂出嚟，就經常以和平、理性自居，召集人高達斌亦因此喺各個陣營中成功上位。不過，佢昨現身旺角踩場反對爆粗教師，就硬係覺得佢身邊「少咁個」，原來佢哋嘅核心成員陳廣文已靜靜雞退出！
陳廣文過去喺愛港之聲一直擔當副發言人兼行動組織部部長要職，示威、論壇逢請必到，認真出心出錢又出力。對於陳廣文忽然退出，昔日好兄弟高達斌否認二人意見不合，話就算陳另起爐灶都係好事喎，仲死撐話個會仲有八百個會員頂住添。
原來陳廣文今次離巢，主要係不滿高達斌領導下嘅愛港之聲過分溫和、經常處於捱打狀態，回顧陣營每次踩場，都係由陳廣文擔大旗發言兼挑起火頭，行動比起成日匿埋一邊指揮嘅高達斌更激更惹火。哦，原來係路線問題。團結就係力量，愛字頭陣營愈嚟愈散，唔知會唔會影響佢哋嘅力量呢？