政情：碗仔翅冇真翅 可能要改名
消費者委員會前總幹事劉燕卿（Connie）喺舊年退休兼過檔聯合國後，市民已經好少再喺電視見到佢。不過，由Connie任內一手催生嘅新修訂《商品說明條例》近排生效後，唔少市民都擔心碗仔翅、揚州炒飯呢啲地道食物，喺新條例下會「被改名」，熟悉條例又好識食嘅Connie就話若果碗仔翅入面冇真翅嘅話，就要改名嘞！
劉燕卿：有誤導成分
Connie解釋，揚州炒飯嘅名稱係約定俗成，但係碗仔翅呢，市民一般見到個名都唔會以為入面真係有魚翅，但條例係確保商戶唔會以虛假宣傳誤導市民，所以佢再經考究後，碗仔翅冇真嘅翅係唔得嘅，咁都有誤導成分，所以碗仔翅必須要有少少真嘅翅喺入面，否則就要改名。
入咗聯合國嘅Connie雖然不時要飛嚟飛去開會，但工作量已經少咗好多，近排佢就成日拉埋老公周圍搵食，呢幾日仲會同朋友去日本長野立山黑部睇風景添，認真識歎。至於上年話為咗方便「煲韓劇」而學韓文呢回事呢，佢話都係諗清楚啲先，果然係精明消費者！