政情：黑波衰開有條路
唔知大家仲記唔記得，新界鄉議局主席劉皇發今年農曆新年期間，喺車公廟為香港求得嘅嗰支車公第九十五籤下籤呢？籤文講到：「駟馬高車出遠途，今朝赤腳返回廬；莫非不第人還井，亦似經營乏本歸。」發展局局長陳茂波（Paul）尋日「駟馬高車出遠途」，竟然撞車，有無咁巧合呀？
堪輿學家指陳運程好弱
阿Paul最近似乎頭頭碰着黑，先被指涉嫌喺新界東北發展計劃有利益衝突，其後該局政治助理何建宗又被揭冇申報家族位於東北發展區嘅資產，接着阿Paul尋日放假揸車時，仲喺跑馬地撞車，傷及頸部添。究竟佢係因為近排發生嘅事情被搞到心緒不寧，抑或黑開有條路呢？
發叔今年喺車公廟求得嘅下籤，但籤文大概寓意一個人風風光光咁離開家園出遠途，但最後要赤腳返回廬。麥玲玲話，籤文其實已暗示官場今年好多事都唔太順利。至於阿Paul嘅運程，麥玲玲就話，佢今年好弱，因為阿Paul出生同天干相合、地支刑剋，所以阿Paul決斷力會差，思路亦唔清晰，直至明年都唔太掂咁話。我哋翻查內地預測運程嘅網站亦都話，一九五五年出生屬羊嘅人士今年運程最終會同夥伴因意見分歧，不歡而散，仲會發生交通意外添喎，真係唔吉利囉。咁其他問責官員及行會成員又點呢？
何建宗張震遠都唔多掂
原來何建宗踏入四十至四十二歲呢個階段，正面對人生一個關口，會有大轉變。麥玲玲話，從相學所看，呢個階段正行到鼻樑位置，十個鼻樑，九個唔靚，所以呢個年紀最易出事。而因涉商品交易所事件而辭退行會成員嘅張震遠就因合走官星，行緊倒官運，所以流年運滯咁話。
其實如果運程同時辰八字嘅關係真係準到咁嘅話，睇怕以後官員上任前除要申報利益外，仲要申報埋自身嘅時辰八字囉！