中環出更：莊偉茵鄧穎珊相逢恨晚
佳能香港副總裁鄧慶治（Mingo）囝囝鄧振豪（Chandler）開設嘅人氣拉麵店，其中環分店喬遷擴充，尋日請晒一班老友前來盡情食麵。卓妮見人群之中，有位嬌滴滴嘅靚女好勤力咁招呼客人，執枱、斟水一腳踢，原來佢係Mingo大女鄧穎珊（Ariel）。Ariel曾經喺國泰做空姐，尋日同前「國泰一姐」中華電力企業發展總裁莊偉茵（Quince）初相識，原來二人曾經係同事，Quince直言有相逢恨晚嘅感覺。
Ariel早年喺澳洲修讀公關及廣告碩士，百足咁多爪嘅佢，曾經喺滙豐銀行工作，又喺國泰航空做過空姐，依家擔任麵店行政總裁，同弟弟拍住上。
二人曾是國泰員工
Quince同老公黃楚權及十七歲嘅細仔黃梓穎都嚟湊熱鬧，Quince一見Ariel即笑言「相逢恨晚」，話若果當年知道佢喺國泰做，一定唔會放佢走喎。不過Quince自己都已經唔係國泰人啦！Ariel就話，做空姐唔只要識捧餐，仲要識急救，並非想像中咁簡單。
唐唐成家溫馨食麵
前政務司司長唐英年同太太郭妤淺以及一對仔女亦有嚟食麵。由於地方細，佢哋一家人分開坐，細女嘉慧跟媽咪，囝囝嘉盛就跟爸爸，唐太同嘉慧一碗麵兩份分，一隻雞蛋兩份食，Sweet到暈。快勞夾大王杜振源因為有事嚟唔到，派咗太太嚟，杜太仲帶咗兩支靚紅酒嚟同大家分享。食麵送紅酒，都幾特別喎。
卓妮