民航處建舞蹈室 公帑究竟為誰花

「馬照跑、舞照跳」,係當年鄧小平對香港人嘅承諾,象徵「一國兩制」五十年不變。估唔到香港民航處活學活用,居然設置咗一個比專業仲要專業嘅舞蹈室,好似想呼應鄧小平嘅號召咁,問你服未。

件事係咁嘅,民航處耗資約二十億元興建坐落於赤鱲角機場島嘅新總部,其中一座大樓內設置附有各項專業設施嘅舞蹈室,面積約六百至七百平方呎,地面鋪上名貴木地板,其中三面牆身裝嵌落地鏡面及設有芭蕾舞扶手,另外一幅牆放咗一個矮櫃,櫃面擺放三個小型揚聲器,櫃內放滿音響器材,相信可供播放音樂伴舞。嗱,講到呢度大家係咪覺得奇怪,民航處又唔係康文署,使咁多錢設置咁專業嘅舞蹈室做乜呢?唔通真係工照返、舞照跳?

聽吓民航處點解畫喇,該處發言人指呢間「多用途室」可供舉行會議、展覽及其他活動,仲話係與建築署「共同商議」後決定設置該房間喎。不過,建築署就有唔同講法,強調設置該房間及設施,由始至終都係應民航處要求進行。兩個部門各有各講,互相矛盾,唔使問阿貴,呢間舞蹈室一定有蠱惑喇。

正如有立法會議員話齋,政府部門辦公大樓內設置舞蹈室嘅情況罕見,因一般文職部門工作時間穩定,康樂用途房間根本用唔着。而公務員工會就認為,公務員只有一小時午膳,冇乜可能抽時間到房內跳舞,擔心公眾會懷疑有人喺辦公時間跳舞玩樂,惹起反感。

冇錯喇,公眾有懷疑係正常嘅。民航處內部流傳,舞蹈室嘅出現可能同民航處處長羅崇文嘅妻子梁婉雅有關,梁婉雅喺民航處任職航空交通管制主任,熱愛舞蹈,所以有人喺設計新總部時,提出設置一個舞蹈室,方便隨時練舞或做瑜伽運動咁話。

以上傳言係咪真嘅,仍有待進一步查證,但可以肯定嘅係,民航處無端端喺總部設置舞蹈室,絕對係九唔搭八,不合情理。當年曾蔭權爵士假公濟私喺禮賓府設置錦鯉池,就話為風水啫,民航處設舞蹈室又為乜呢?如果話唔係為方便高層跳舞玩樂,你都唔信喇。

所以話,港產官僚冇嘢叻,假公濟私就最叻。反正使嘅係公帑,小花筒又好,大花筒又好,又唔使自己埋單,何樂而不為。嗱,爾俸爾祿,民脂民膏,納稅人嘅錢唔係用嚟嘥o架。睇嚟審計署係時候替民航處計一計數,呢間舞蹈室究竟浪費咗幾多公帑,有冇官員需要問責。

無論點都好,功夫茶想提醒民航處官僚,你哋嘅職責係維持航空交通秩序及安全,跳舞還跳舞,千祈唔好跳出個大頭佛,否則,萬一樂極生悲,你哋都走唔甩嘅咋!