前漁農界立法會議員黃容根作為業界老行尊，同漁農有關嘅業務梗係難佢唔到啦，但點知喺香港做猛虎嘅根叔，去到越南卻不敵地頭蟲，食海鮮竟然被當地漁民鋸到一頸血，認真失威。
話說根叔早前同一班漁農界朋友去越南旅遊，當去到北越下龍灣嘅時候，正值下午茶時間，所以根叔同一眾團友就諗住分別坐喺三艘小船上歎杯茶，食吓海鮮。當地除咗有船家即捕即煮嘅生猛海鮮外，仲有一啲魚檔任君選擇，但由於導遊話船家販賣嘅海鮮靠唔住，所以根叔同班朋友就決定去魚檔搵正嘢。點知佢哋指吓、點吓柯打完幾味魚、蝦、蟹後，先發現每人盛惠二千元人仔（人民幣），價錢足足貴香港一倍。
點解咁失策呢？根叔話，本來佢已經叫啲朋友唔好買魚檔啲海鮮，因為嗰度賣嘅蟹，八成係水蟹，喺香港只會用嚟煲粥，最貴賣七十元一斤，但越南就賣到近二百元一斤，而當地嘅墨魚更比香港賣貴三倍，真係劏得就劏，鋸得就鋸咁話。不過，根叔話最緊要都係成團人一齊玩得開心，唔想大家掃興，最多下次唔再去幫襯囉！