顧名思義，政治難民就係政治因素而流離失所嘅人。根據呢個定義，港府梁班子都算係一個政治難民集中營咯，呢嗱，又有問責官員中箭，被迫執包袱逃難嘞。呢位政治難民咪就係發展局政治助理何建宗囉，因為捲入新界東北發展計劃利益衝突醜聞而狼狽辭職。
點解功夫茶咁有興致講政治難民？當然唔係因為高官蒙難啦，今屆政府施政混亂，醜聞多多，已經唔係新聞，功夫茶今日想講嘅係真正嘅政治難民問題。
不如睇一項調查先。有政黨調查顯示，本港現時約有五千名南亞或非洲裔政治難民申請酷刑聲請，平均等二至八年，由於期間唔可以工作，只能依靠社署周濟度日，每年耗費約二億元公帑。調查同時顯示，七成半市民擔心難民數目持續上升，認為政府唔應該以公帑援助難民；六成認為應由聯合國津貼至啱。
事實好清楚，港府嘅難民政策就係冇政策，香港淪為無掩雞籠，難民源源不絕湧入，搞到烏煙瘴氣。最慘係港府請客，市民埋單，呢條數根本係無底深潭。嗱，尋日有五十名難民請願，要求港府援助加碼，將生活津貼由現時每月一千二百元增加至三千元，期間有難民情緒激動，與接報到場嘅警員發生激烈推撞，場面混亂。大家話嘞，難民愈嚟愈多，客家霸地主，依家仲要發窮惡，香港就算唔陸沉都遲早食窮喇。
其實，錢都係其次，影響治安至係最大問題。唔少所謂嘅政治難民根本係掛羊頭賣狗肉，利用酷刑聲請漏洞嚟香港作奸犯科，打黑工嘅有，打家劫舍嘅有，打打殺殺嘅有，如果繼續縱容呢班人，早前廣州黑人大暴動遲早喺香港重演嘅咋！
咁講啦，難民係要幫，不過要幫得其所；人權係要講，不過唔等於做老襯。試諗吓，呢個世界除咗港府之外，邊有咁多政治難民吖？如果酷刑聲請變成外籍人士偷渡來港食大茶飯嘅捷徑，如果「行街紙」政策淪為不法之徒喺香港作奸犯科嘅通行證，到時真正蒙難嘅唔係呢啲所謂政治難民，而係全港七百萬市民呀！
話時話，港產官僚對難民問題放任不管，絕對唔係因為有同情心，而係因為無責任心。難民問題存在咗咁多年，搞到亂象叢生，佢哋做過乜嘢吖？難民犯案無日無之，佢哋有冇制訂措施防止吖？港府收咗難民之後就闊佬懶理，講得好聽叫幫人，講得唔好聽根本就係靠害。
正如政黨話齋，港府唔可以再對政治難民問題唔嗲唔吊，一係對有關申請加快審批，一係開設收容中心加以管制，如果繼續來者不拒，港產官僚等住做政治難民都得嘞！