政情：今日你上鏡：與發叔握手「和」氣收場？

屏山鄉鄉事委員會主席曾樹和等三十多人早前訪問北京，佢哋一反常態搵咗新界社團聯會會長梁志祥隨團，因而被指有意飛起以劉皇發為首嘅鄉議局。不過，真係講都無咁蹺，發叔尋日應邀出席活動時，姍姍來遲嘅曾樹和一到場二話不說就同發叔搭膊頭同握手，疑似想闢謠咁款。曾樹和事後更加多兩錢肉緊形容同發叔係自己友，認為相關傳聞係「想像力太豐富」，強調今次訪京好似當去某個景點，之後更主動提到明年臨近村代表選舉，所以未必會有類似行程喎。咁講法，今次鄉議局冇得訪京咪走寶？