政情：王威信批大球場遭濫用
闊別甲組三十三年嘅元朗足球隊強勢回歸，本來絕對係一件可喜可賀嘅事情，點知撞啱最近香港大球場發生草地變爛地醜聞，連球隊主席王威信都有話要講，揭發大球場同其他足球場好多時都舉辦布道會、步操等活動，唔單只淨係專門舉行球賽，似乎暗示踩得多會踩爛啲草地，睇嚟港府認真要去正視吓草地球場嘅使用情況喇！
唔似外國專作球賽用
王威信尋日出席活動時大談佢對草地球場管理嘅觀察，話依家好多活動或比賽已預定咗喺大球場舉行，唔似好似外國咁專門用作球賽之用，加上去水系統麻麻哋，自然令到草地情況不太理想喎，所以佢都認同要重鋪大球場草地。不過，佢估計最快要到明年五、六月先可以成事，事關好多團體都一早預訂大球場舉行活動喎。
至於元朗大球場嘅最新情況，王威信話元朗大球場去水情況亦係麻麻哋，所以佢哋特別將球場嘅草養長啲，等球賽進行時個波唔會咁彈。佢識得就問題對症下藥，相反負責大球場管理嘅康文署一味賴最近天氣惡劣多雨，認真高下立見。