中環出更：楊志超嘆舖租貴 削港競爭力
近年香港舖租愈升愈高，已超越商戶承租能力，好多商戶都負擔唔起而要結業收場。以本土文化為招徠嘅特色家品店創辦人楊志超（Douglas），最近亦不敵租金嘅升幅而忍痛關閉兩間分店。Douglas話，在商言商，業主謀求最大利益實在無可厚非，但長遠而言，香港嘅競爭力可能因此而受到削弱。
地道小店買少見少
Douglas話，面對周邊地區嘅激烈競爭，香港人有必要從本土文化當中發展出別具特色嘅創意產業以爭雄長，可惜租金太過高昂，不但淹沒咗好多具有香港情懷嘅商店，更會驅使有意從事藝術創作嘅年輕人，移師至成本較低嘅台灣或內地以一展抱負，長此下去香港優勢恐怕難以維持。
佢又話，有好多曾經訪港嘅外國朋友打算幫襯本地小店以感受香港風情，誰知舉目所見皆是熟口熟面嘅「來路」品牌，實在敗興咁話。至於生意市道，Douglas話縱使近年冒出大量競爭對手，然而論融會本土文化嘅家品設計，都係以佢嘅品牌首屈一指，見佢賣花讚花香，睇嚟佢對經營自己盤生意都好樂觀喎。