中環出更：電訊鬼才 林國誠撐擦鞋檔
早幾年政府想趕絕喺中環街邊搵食嘅擦鞋匠，幸好因為社會各界出聲力撐，名人亦爭相幫襯支持，先至令呢個香港特色得以保留。早幾日下午大約兩點鐘，卓妮喺中環遇見電訊界「營銷鬼才」香港電訊高層林國誠（Bruce），食完飯後專登行到戲院里擦鞋，只消八分鐘，花費三十元，腳下對鞋即刻立立令，又可以靚靚仔仔見人喇！
當日Bruce急急腳由皇后大道中行到戲院里擦鞋匠攤檔前，不過當時佢幫襯開嗰檔有客人，Bruce雙手插落褲袋，耐心輪候大約五分鐘，但等等吓都係放棄，幫襯隔籬未有客嗰檔。卓妮見佢好熟練咁伸出隻腳，睇嚟都唔係第一次幫襯。Bruce曾經參加過「窮富商大作戰」，過咗幾日露宿者生活，難怪佢咁支持自食其力嘅小攤檔。
Bruce畀完錢後，就快步行到中建大廈前嘅的士站，打算上車離去。卓妮上前同佢打招呼，佢就話啱啱同客戶食完晏，要趕返公司搏殺。Bruce原本係國際手提電話品牌嘅港澳區掌舵人，年前跳槽到香港電訊出任無線業務巿場營銷總裁，繼續發揮佢嘅銷售天分。
曾體驗露宿街頭生活
講起當年喺聖誕節露宿街頭體驗，Bruce話嗰年聖誕係歷史少見嘅寒冬，所以瞓街真係好辛苦，電視最終播出嘅只係三分之一，仲有更多艱苦實況冇播出街喎！
卓妮