手機呢家嘢，絕對係家居旅行必不可少嘅日常裝備，否則唔會有咁多男男女女淪為「機不可失」嘅低頭族，甚至因為過分倚賴手機而患上「數碼癡呆症」。之但係好可惜，科技先進唔代表電池長壽，所謂智能化嘅手機用唔夠半日就奄奄一息，再唔充電就會壽終正寢。功夫茶真係唔明新一代手機嘅電池點解會短命成咁，史上最短命嘅發展局局長麥齊光都有十二日貨仔吖，手機電池捱到一日都算奇迹。
正正因為手機電池實在太短命嘞，所以俗稱「尿袋」嘅充電器便成為另一件必不可少嘅日常裝備，以免冇電之後低頭族恐慌到以為世界末日。好衰唔衰充電器良莠不齊，最離譜嗰隻隨時有可能導致人命傷亡，稱之為「殺人尿袋」絕無誇張。好似新疆一位二十三歲空中小姐咁吖，一邊充電一邊講電話，點知突然觸電死亡，據講當時用嘅係山寨充電器。
山寨貨固然冇品質保證，就算係原廠貨都未必靠得住o架。香港有位家住馬鞍山嘅男子，使用啱啱買咗一個月嘅三星GALAXY S4手機，充電期間手機爆炸，雖然同老婆及時逃生保得住命仔，不過全屋就燒到七零八落嘞。嗱，人哋用嘅係原廠電池喎，咁都爆炸着火確係令人驚到三魂唔見七魄！
講到呢度，功夫茶有一個疑問，既然幾乎一人一部嘅手機存在咁大嘅安全隱患，政府係咪應該加強檢測有效監管呢？打個譬喻吖，如果食物含有孔雀石綠或者三聚氰胺，官老爺都應該千方百計禁止進口啦，若然手機或者電池有爆炸或者漏電嘅危險，發出禁售令不失為以策萬全嘅好方法喎。
即使官僚主義者懶得就懶，堅決奉行少做少錯不做不錯嘅官場鐵律，消費者委員會又點呢？不如咁啦，消委會睇睇本報記者訪問專家嘅意見，然後為消費者做一做測試，提醒大家唔好用高危貨色，以免再搞出人命。
專家意見大概係咁嘅，手機爆炸嘅三大危機分別係「機件老化」、「山寨配件」同埋「撞擊及過熱」。器材老化嘅意思係手機及電池有機會因為短路而引起爆炸。山寨配件就唔使多講啦，尤其係內地山寨廠製造嘅劣質貨色簡直係生人勿近。至於撞擊及過熱咯喎，爆炸嘅原因亦係零件受損而短路。
簡單咁講，手機係不容忽視嘅「流動炸彈」，一不小心可能炸到你雞毛鴨血，用家千祈唔可以掉以輕心。特區政府若然唔想民望繼續跌到阿媽都唔認得，唔該扚起心肝為民請命，切切實實監管一下。喂，講緊嘅係人命關天呀，一棵樹壓死人都要成立樹木辦好好管理啦，手機害死人點可以唔理o架！