陳茅波加入ＣＹ團隊一年，醜聞爆完一鑊又一鑊，當真比賀歲煙花更璀璨，最近囤地醜聞更是愈揭愈臭，愈解釋愈令人迷惑，冇嘢嘅，一個大話冚一個大話，茅波及其「家人」、「朋友」，竟然予人像霧又像花的感覺！
陳茅波儘管使出聖經金句及祭出新亞校歌，之不過不誠無物，佢又話自己回應囤地事件嘅表達方式比較「論盡」，同意可以處理得更好！唉！老朽但知ＣＹ攬住個醜聞深水炸彈，一味話茅波先生「符合申報制度要求」，政府高層亦發出「不炒不辭不換」呢個訊息，茅波先生於是厚着臉皮，死拍心口要繼續「為港人服務」，其心不死，其勇氣更可嘉！
老朽深信一個在市民眼中無誠信只係個大話精嘅高官，根本推乜都死，唔好話再推新界東北發展計劃啦！有個笑話，話說有送枇杷與一縣令者，誤寫作「琵琶」。縣令笑口曰：「『枇杷』不是此『琵琶』，只恨當年識字差。」適有客在座，揶揄曰：「若使『琵琶』能結果，滿城簫管盡開花。」令人嘆賞。
如今，茅波先生話自己表達方式「論盡」，大佬啊，你嘅所謂「論盡」，根本就係語言偽術，連建制派頭頭都話你一開始就擠牙膏式交代，又唔肯放棄所謂「私隱」，又當全港市民係傻嘅！如果咁都叫問責，叫行得「正」，滿城簫管當真開花，真係狗屎都會變黃金！
ＣＹ死攬住茅波呢個最大負資產，連揮淚斬馬謖都唔捨得上演，睇怕背後亦有難言之隱。老朽又諗起個笑話；有叫賣糕者，聲甚啞。人問何以至此，答曰：「我餓耳。」問：「既餓，何不食糕？」賣糕者低聲曰：「是餿的。」
一個冇誠信，兩個又冇誠信，太多語言偽術，太多變臭變餿的「私隱」，這個政府還能有甚麼「適度有為」？