港府成日話香港係盛事之都，但有乜盛事可以振興經濟又深入民心，其實一隻手數得晒，所以唔少人都希望香港效法新加坡，申辦一級方程式大賽車（F1），認為以香港夜景街道作跑道，一定好有特色。盛事基金主席林健鋒（Jeffrey）透露，香港唔係冇得搞F1，只係街道有好多坑渠蓋，係一個令F1難成事嘅因素。
Jeffrey話，新加坡每年都搞F1，要重鋪賽車級馬路，仲要搵地方興建維修站，連馬路邊嘅坑渠蓋都要逐個逐個用燒焊鎖死，以免車速太快時「片」起啲坑渠蓋，危及車手同觀眾。佢質疑香港有咁多坑渠蓋，到底有關部門肯唔肯配合呢？加上香港馬路多彎且窄，好可能只能舉辦三級方程式賽事，但咁做又會同隔籬澳門爭飯食，所以喺香港搞F1有一定難處囉。
今年政圈咁多是非，Jeffrey本來打算暑假去北海道札幌休閒一下，點知有「高人」叫佢咪去，因為當地輻射指數上升咗少少，估計係吹北風關係，令福島輻射吹晒去北海道喎。至於呢個消息係咪真確，真係要測量過至知。