早前東華學院為咗新校長遴選問題搞到滿城風雨，但現任校長汪國成一於好少理，已應承校董會做到搵到新校長接任為止，仲揚言要喺未來七年內協助東華學院升格為有知名度的醫療科學大學。為咗提升院校設備，佢仲特登搬走咗兩座東亞運動會遺留下嘅摔角巨型擂台，再進行校內大裝修。
有知情人士透露，原來兩座巨型擂台係東華學院前身、即中文大學東華三院社區書院嘅時候接收返嚟嘅。話說○九年香港舉辦東亞運動會結束後有唔少剩餘物資，希望免費送畀啲非牟利機構，當時書院覺得學生用得着，結果花咗六、七千元運費搬番學校畀學生打功夫、耍太極，可惜兩座擂台實在太大，每次使用都要拆散再組件。
汪國成接任東華學院校長後，覺得放置喺衞理道校園十八樓嘅兩座擂台實在太阻地方，所以最終搬走咗，經過一番裝修，現已成為寫字樓。雖然未知該院幾時搵到新校長，但汪國成就暗示自己無退休年齡，因為教書係佢終身興趣，依家帶住七個理工大學同教育學院研究生做研究，「教書可以鬆弛神經，日後亦諗住寫書講吓自己嘅一生」。