中環出更：廠商會下年80歲 請市民食雪糕
中華廠商聯合會明年慶祝成立八十周年，會長施榮懷（Irons）同一眾會董們已經密密度橋，打算搞一場有意義嘅生日派對。Irons透露，佢哋將捐贈巨款畀本港某間大學，以支持本地工業及教育，數額多達二、三千萬元，到時仲會請全港市民食雪糕添！
捐款予大學 獲校舍命名
Irons日前同廠商會副會長楊志雄及吳永嘉（Jimmy）等一班手足食飯，一講起明年嘅八十周年慶祝活動，興奮過自己過生日。Irons話，廠商會對上一次捐款畀大學，已經係幾十年前，今次捐錢將獲得校方給予校舍以廠商會名義命名，意義好重大，事關係該會成立以來嘅第一次。Jimmy就爆料話，明年九月一日係廠商會生日正日，所以當日佢哋將透過報章等渠道，印製贈券免費請全港市民食雪糕，最緊要與民同樂喎。
卓妮見「耳機大王」楊志雄成晚笑容滿面，不時同人分享手機內嘅相片，實情係佢啱啱榮升爺爺，孫仔眼仔睩睩好精靈，難怪佢一提起寶貝孫仔就笑不攏嘴喇。
卓妮